Rev 4 | KWJ | STEP | O mwanji hinga humbusiwani, hewen ko tokwe a mauni ani heiwani aka duwa foti ya tukwasinda. Wosiwani metengei fu ata hinga gini ani sawero takisopo kumbwa apa ani ai mendiwani ka hinga sawe, “Aha'a ki ma sukwawa ichai sukwano mwa'ambwe le mini a mekusi.”

Revelation of John 4

Hewen ko ki dau Gotri ni lotu wondau

1 O mwanji hinga humbusiwani, hewen ko tokwe a mauni ani heiwani aka duwa foti ya tukwasinda. Wosiwani metengei fu ata hinga gini ani sawero takisopo kumbwa apa ani ai mendiwani ka hinga sawe, “Aha'a ki ma sukwawa ichai sukwano mwa'ambwe le mini a mekusi.” 2 Ete wowani metengei ete Gotri Himamwale kwambu tinga ani toronambusiwani ani heiwani hima fori King Apukolaka linindau tei ki ya ri lininda. 3 Wosini ri tape ti humokuto fo hi ti, jasipa, e, humokuto naro fo hi ti, koniliyan, hinga ya okunda. Ete wondawani mwahiworo foti King Apukolaka tei o tini jambanisiwani ani heiro ti humokuto mingasumbwe fo hi ti, emeral, hinga. 4 O michi kumbwa linindau tei ti 24 hinga o King Apukolaka tei ni jambanisinda. Wosiwani 24 mekupu hima laka le o tei tenge ki ya wu lininda. Kale mekupu hima laka nika'ari wamwa leni wu so'oisini mwa wuhi ki gol ba wosiro mwalinjangwei hinga ni ya wu letisinda. 5 King Apukolaka linindau tei o ki niri ki lepakinandau hi tinga niri kundau ata tinga sukwandawani ele ata i nindo ki tumwa fwele ya ginda. Wondawani King Apukolaka tei linindau miyaningisopo tokwe tapa'angi hatachi fisi hambachika ti o ki ya okunda. Kale hambachika tapa'angi hatachi fisi Gotri himamwale leni sawero. 6 King Apukolaka litini miyaningisopo ri sindau tokwe mwa'ambwe foti soluwara laka hinga to ya da. Mwa'ambwe mwe ti galasi hinga, halaya naha.

Wondawani opuri'opuri mwa'ambwe fo himamwale ga dau ti, o King Apukolaka linindau tei gamba tokwe wu haweisini ya wu eninda. Ele opuri'opuri mwa'ambwe ele tape wuhi ti, miya lembwa gumwa mapwa wunu talesindau. 7 Metengei naha ani heiwani himamwale ga dau mwa'ambwe foti kapwa asa fo, hi ti, laiyon, hinga eninda. Wosini o diya ga ani heiwani bulumakau hura hinga. O gaha ga ani ai heiwani ri miyaningisopo ti hima i miyaningisopo hinga. Wosini jipe naha ki ani heiwani hanga'i hangatandau apokumboni laka hinga. 8 Kale himamwale ga dau mwa'ambwe opuri'opuri wunu funda funda tipi hapa wuhi ti tapa'angi hatachi funda hinga wunu ki dau. Miya wuhi ti miyafo naha, wui tape ti, e, tipi tako wuhi okwe, tinda miya tumbwa. Wondani niliki tapwaki wunu ka hinga wu sawendau,

“Apukolaka Gotri rini ele kwambu ga dau. Rini halaya naha, rini halaya naha, rini halaya naha.
Imbihumbwa ri daro ti, apa ri dani, ichai o ri ai takonda.”
Wunu ka mwanji hinga wu bwandani fai wu kutonda nambwe.

9 Kale himamwale ga dau mwa'ambwe wunu ete da ete da Gotri ri litindau tei ki ri linindawani rini ni wu wese'andani wu eripe'aripeni hi rihi tini ya wu rasainda. 10 Ete wondawani 24 mekupu hima laka le, Gotri tei rihi ki ri linindawani ri miyaningisopo ki wu opulisini ete da ete da Gotri ni ya wu lotu wonda. Wondani mwa wuhi ki wu letindau gol ba wosiro mwalinjangwei wuhi ti ri linindau tei miyaningisopo ki wu humbwe'isini ya wu sawe,

11 “Apukolaka, nui Gotri!
Mini ele hima hinga mini ni wu eripe'aripeni hi mihi wu rasaindani mi kwambu ti tako tokwe wu dano sumbu ti mini ki chikisindau.
Hinde wowani, mindo ele mwa'ambwe hinga tinda mi wosiro. Wosiwani mi okokona kumbwa ele mwa'ambwe hinga tinda ete sukwasini do ya ete da.”